Gəncədə xəsarət almış şəxsin ölməsi faktı üzrə cinayət işi başlanılıb. Baş Prokurorluğun Mətbuat Xidmətindən Oxu.Az-ın sorğusuna cavab olaraq bildirilib ki, mayın 12-də, 2007-ci il təvəllüdlü Elgün İbrahimovun Gəncə şəhəri, M.Xələfov küçəsində yerləşən yataqxananın həyətində aldığı xəsarət nəticəsində bu gün müalicə olunduğu xəstəxanada vəfat etməsi barədə şəhər prokurorluğuna məlumat daxil olub. Faktla bağlı Gəncə Şəhər Prokurorluğunda Cinayət Məcəlləsinin 126.3-cü (qəsdən sağlamlığa ağır zərər vurma ehtiyatsızlıqdan zərərçəkmiş şəxsin ölümünə səbəb olduqda) maddəsi ilə cinayət işinin ibtidai istintaqı aparılır. Cinayət əməlini törətmiş şəxsin və ya şəxslərin müəyyən edilərək istintaqa cəlb olunması istiqamətində daxili işlər orqanları ilə birgə zəruri və təxirəsalınmaz istintaq-əməliyyat tədbirləri davam etdirilir. 

 Gəncədə 11-ci sinif şagirdi Elgün İbrahimovun ölümü ilə bağlı bəzi detallar məlum olub. Panarama.az "Teleqraf"a istinadən xəbər verir ki, o, ağır vəziyyətdə gecə saatlarında Məmməd Xələfov küçəsi 115 ünvanında - Azərbaycan Texnologiya Universitetinə məxsus, hazırda tərk edilmiş yataqxananın həyətində tapılıb. Bildirilir ki, bu yataqxanada bir müddət əvvələdək məcburi köçkünlər məskunlaşıbmış. Əraziyə yaxın olan peşə məktəbinin mühafizəçisi Elgünün inilti səslərini eşidərək, hüquq-mühafizə orqanlarına xəbər verib. Hadisə yerinə dərhal polis və prokurorluq əməkdaşları cəlb olunublar. Yeniyetmə Gəncə şəhərindəki xəstəxanalardan birinə çatdırılsa da, ertəsi gün səhər saatlarında vəfat edib. İki qardaşdan böyüyü olan Elgün İbrahimov Gəncə şəhər S.Vəliyev adına 34 nömrəli orta məktəbin rus bölməsinin 11-ci sinfində oxuyurmuş. Elgünün dayısı Rövşən Zeynalov bildirib ki, o, dərsdənkənar hazırlığa gedirmiş və hadisənin də həmin hazırlıqdan çıxandan sonra baş verdiyi ehtimal olunur: "Uşağı görəndə tanımadım. Baş nahiyəsi tamamilə əzilib, gözünün biri yerində olmayıb. Bu vəhşilikdir. Biz bu vəhşiliyin kim və ya kimlər tərəfindən törədildiyini bilmək istəyirik. Bu bir nəfərin işi deyil. Uşağın ağciyərləri belə partlayıb. Tam məsuliyyətimlə deyirəm, heç kimlə işi olmayan, sakit, yalnız dərslə maraqlanan bir uşaq idi. Mayın 4-də rus bölməsi üzrə keçirilən imtahanda çox yüksək bal toplamışdı. Anası bu uğura görə bizə gözaydınlığı vermişdi". Qeyd edək ki, faktla bağlı araşdırma aparılır. 

 Gəncədə küçədə döyülən 18 yaşlı oğlanı ölümdən xilas etmək mümkün olmayıb. Oxu.Az-ın əldə etdiyi məlumata görə, 2007-ci il təvəllüdlü Elgün İbrahimovun çatdırıldığı xəstəxanada ürəyi dayanıb. Sonradan tənəffüs aparatına qoşulub ürək döyüntüləri bərpa edilsə də, saat 12:10-da ölüm faktı qeydə alınıb. Əzizə İsmayılova 10:58 Gəncədə küçədə döyülən və xəstəxanada öldüyü deyilən 18 yaşlı oğlan sağ imiş. Oxu.Az-ın məlumatına görə, E.İbrahimovun ürək döyüntülərinin fəaliyyəti süni tənəffüs aparatı vasitəsilə bərpa edilib. O, hazırda komatoz vəziyyətdədir. Vəziyyəti həddindən artıq ağır olan E.İbrahimovun müalicəsi davam etdirilir. 10:48 Gəncədə küçədə ağır xəsarətlər alan gənc oğlan aşkarlanıb. Panarama.az bildirir ki, Oxu.Az-ın məlumatına görə, 2007-ci il təvəllüdlü E.İbrahimov şəhərin E.Xəlilov küçəsində aşkarlanıb və o, dərhal xəstəxanaya aparılıb. 18 yaşlı Elgün İbrahimov müxtəlif dərəcəli bədən xəsarətləri, ağır kəllə-beyin travması ilə xəstəxanaya qəbul olunaraq dərhal ilkin tibbi yardım göstərilib. Amma onun həyatını xilas etmək mümkün olmayıb. Yaralı nəfəs çatışmazlığından dünyasını dəyişib. İlkin ehtimala görə, E.İbrahimov döyülərək ağır xəsarətlər alıb. Onun üzərində hər hansı kəsici deşici və ya güllə izləri aşkarlanmayıb. Faktla bağlı araşdırma aparılır.