Türkiyədə itkin düşdükdən 19 gün sonra meyiti tapılan və vəhşicəsinə qətlə yetirildiyi öyrənilən səkkiz yaşlı Narinlə bağlı ortaya çıxan təfərrüat ölkəni yasa boğmağa davam edir. Bəzi məşhurların bu faciədən reytinq naminə istifadəsi isə xalqı daha da qəzəbləndirib. Belə hadisələrdən biri "Beyaz TV"də yayımlanan "Söylemezsem Olmaz" verilişində yaşanıb.

Oxu.Az-ın "Türkiye Gazetesi"nə istinadla verdiyi məlumata görə, verilişin aparıcısı Hande Sarıoğlu efirdə "Narin üçün fəryad qoparırıq" deyərək, digər aparıcılarla birlikdə qışqırmağa başlayıb.

Bu anlar sosial mediada yayılaraq, izləyicilərin qəzəbinə səbəb olub. İnsanlar aparıcıları reytinq uğrunda hər şeyi etməkdə günahlandırıblar.

"Belə bir faciəni şouya çevirmə artıq...", "Reytinq naminə nələr edilir", "Başqa "parlaq" fikirləriniz də var?" və s. kimi şərhlərlə istifadəçilər sosial şəbəkələrdə aparıcıları kəskin tənqid ediblər.

Qeyd edək ki, Narin hadisəsi Türkiyəni sarsıdan faciələrdən biri olub. 8 yaşlı qızcığazın ölümündə atası, əmisi, anası da daxil olmaqla yaxınlarının adının hallanması bu hadisəni xüsusi faciəli edib. Aparıcıların belə bir dəhşətli hadisəni şou üçün istifadə etməsi isə tamaşaçılar tərəfindən kəskin pislənilib.